«էլի տասն այրի» / հատված Նիկոլ Փաշինյանի «Երկրի հակառակ կողմը» գրքից

      «Մեր տանը նստած էի, կյանքում հանրահավաք չէի հրավիրել, որևէ հանրահավաքում ելույթ չէի ունեցել: Մեր տանը նստած էի, երբ սպանեցին Պողոս Պողոսյանին: Մեր տանը սուրճ էի խմում, և հեռուստաալիքներն ասում էին, որ «Առագաստ» սրճարանի զուգարանում մարդ է մահացել սրտի կաթվածից: Ոչ ոք չէր համարձակվում ասել, որ այդ մարդուն`Պողոս Պողոսյանին, ոչ թե ինֆարկտ է խփել, այլ նրան սպանել է բռնապետի ոհմակը: Դա տեղի է ունեցել ազգիս որդնած սերուցքի աչքի առաջ, այն նույն պոռնիկների աչքի առաջ, որոնք երգում են հայի աչքերի մասին, և որոնք չեն նկատել Պողոս Պողոսյան անուն- ազգանունով հայի աչքերից դուրս հորդող օգնության աղերսը: Նրան սպանեցին այն օրը, երբ տանը սուրճ էի խմում անվրդով, սպանեցին ազգիս բոհեմական պոռնկատանը, ազգիս հարյուրավոր «մեծերի» աչքի առաջ, բայց չգտնվեց մի վկա, որ դատարանում պատմեր, թե ինչ է տեղ ունեցել: Չգտնվեց: Պողոս Պողոսյանի մահվան հանգամանքներն ուսումնասիրող խորհրդարանական ժամանակավոր հանձնաժողով էլ չստեղծվեց: Քյար չկար մեջը:

     Կարո՞ղ էի որևէ բան անել, որ աղետը տեղի չունենար, կարո՞ղ էի այնպես անել, որ Պողոս Պողոսյանը չսպանվեր, որ ողջ լիներ Պողոս Պողոսյանը:
     Չէի շտապում պատասխանել, ցանկանում էի հարցը ներծծվի իմ մեջ, դառնա իմ ինքնության մասը:
     Տանը նստած սուրճ էի խմում, երբ նույն կերպ՝ ծեծելով սպանեցին Արտյոմ Սարգսյանին, որը ղեկավարում էր ասպիրանտների շարժումը՝ հանուն տարկետման իրավունքի: Նրան նպատակային տարան բանակ ու նպատակային սպանեցին ծեծելով…
     Լույսի լճակ աչքերն հայի…
     Ցամաքեցրին ևս մի լճակ. ես տանը սուրճ էի խմում՝ հեռուստացույցի առաջ: Հեռուստացույցը ոչինչ չէր ասում, այլ երգում էր լինզայված աչքերի հրաշքի մասին, աչքեր, որ սպանել տվեցին Արտյոմին:
     Իսկ ես կարո՞ղ էի ինչ-որ բան անել, որ աղետը տեղի չունենար, կարո՞ղ էի այնպես անել, որ Արտյոմին չսպանեին, որ նա ապրեր, ողջ լիներ: Չէի շտապում պատասխանել այս հարցին, ցանկանում էի, որ հարցը ներծծվի իմ մեջ, դառնա իմ ինքնության մասը:
     Տանը նստած սուրճ էի խմում, խաղ էի անում երեխաներիս հետ, երբ սպանեցին Կարինե Սարգսյանին: Սպանեցին Մալաթիայի բանկի խաչմերուկում, սպանեցին այն պահին, երբ նա սև հաց և կաղամբ էր գնում իր ընտանիքի ընթրիքի համար: Սպանեցին օրը ցերեկով: Ես այդ ժամանակ խաղ էի անում իմ զավակների հետ, ովքեր այդ օրը ընթրիքին կաղամբ կերան՝ սև հացով:
     Կարո՞ղ էի ինչ որ բան անել, որ աղետը տեղի չունենար, կարո՞ղ էի այնպես անել, որ չսպանեին Կարինե Սարգսյանին, որ ողջ լիներ Կարինե Սարգսյանը, լիներ իր ամուսնու կողքին, իր երեխաների հետ:
    Չէի շտապում պատասխանել այս հարցին, ցանկանում էի, որ հարցը ներծծվի իմ մեջ, դառնա իմ ինքնության մասը:
    Հետո սպանեցին Լևոն Լևոն Գուլյանին. ծեծեցին, նա կորցրեց գիտակցությունը: Մտածեցին՝ կմահանա, ցած նետեցին պատուհանից, որ ասեն՝ ինքնասպան է եղել: Կարո՞ղ էի ինչ –որ բան անել, որ աղետը տեղի չունենար, որ չսպանեին Լևոն Գուլյանին, որ ողջ լիներ Լևոն Գուլյանը:
    Ե՞րբ սպանեցին Լևոն Գուլյանին. պաշտոնական տեղեկատվությունն ասում է ՝2007 թ. մայիսի 12-ին:
     Ո՛չ, ասում եմ ես, 2008 թ. մարտի 1-ին: Իսկ 2007թ. մայիսի 12-ին ոստիկանության շենքում սպանեցին Գոռ Քլոյանին:
     Տիգրան Խաչատրյանին սպանեցին «Առագաստ» սրճարանի զուգարանում ծեծելով, իսկ Պողոս Պողոսյանը սպանվեց Մարտի 1-ին Մյասնիկյանի արձանի մոտ:
      Կարո՞ղ էի ինչ-որ բան անել, կարո՞ղ եմ ինչ-որ բան անել:
     Այո՛, կարող եմ ինձնից կախված ամեն ինչ անել հանուն այնպիսի Հայաստանի ստեղծման, որ սիրում է իր զավակներին, որ չի սպանում իր զավակներին: Եթե հարկավոր է, կարող եմ զոհվել հանուն այդ Հայաստանի: Իսկ ինչու՞ չզոհվեցի:

Օ՜, դա արդեն ես չեմ որոշում, դա արդեն որոշում է ճակատագիրը: Ես չեմ փախչի իմ ճակատագրից, հավատարիմ կմնամ իմ ճակատագրին»:

 Նիկոլ Փաշինյան «Երկրի հակառակ կողմը»

Լուսանկարի աղբյուրը`https://www.upi.com/

Օգնենք բովաձորցի փոքրիկներին ունենալ ժամանցի և զարգացման իրենց անկյունը

Դրամահավաք բովաձորցի փոքրիկների համար ժամանցի անկյուն հիմնելու համար

Սիրելի ծանոթներ և անծանոթներ,
Բովաձորը իմ հարազատ գյուղն է: Այստեղ մանկապարտեզ չկա: Երբեք չի եղել: Չկա նաև նախադպրոցական տարիքի երեխաների համար ժամանցի որևէ անկյուն: Միակ վայրը, որտեղ երեխաները կարող են խաղալ, համայնքապետարանի բակն է: Այստեղ կա մեկ սղիկ, սովետական տարիների մեկ պտտվող կարուսել և ավազով խաղալու անկյուն:

Երկար մտածելուց հետո, որոշեցի իրականացնել դրամահավաք, հավաքված գումարով մեր գյուղի 2-6 տարեկան երեխաների համար հիմնել ժամանցի և զարգացման անկյուն, որտեղ փոքրիկները կկարողանան օրվա գոնե 4-5 ժամը միասին անցկացնել, խաղալ ու զարգանալ:

Համայնքապետ Արայիկ Ներսիսյանը պատրաստ է ժամանցի անկյունի համար տրամադրել վերանորոգված համայնքապետարանի լուսավոր և արևոտ սենյակներից մեկը: Եվ ինչպես մեր զրույցում նշեց պարոն Ներսիսյանը, ձմռան ամիսներին համայնքապետարանը հոգ կտանի նաև սենյակի ջեռուցման հարցը:

Հավաքված ողջ գումարից կգնենք մանկական զարգացնող և զվարճանքի խաղեր, մանկական կահույք`սեղան, աթոռներ, կախիչ, խաղալիքների պահարան, գորգ, ներկելու, նկարելու պարագաներ, հեքիաթի և զարգացնող գրքեր և այն ամենը, ինչ անհրաժեշտ կլինի փոքրիկների առօրյան գունավոր և ուրախ դարձնելու համար:

Եթե կան անհատներ կամ կազմակերպություններ, որ ցանկություն կունենան խաղալիքներ, գրենական պիտույքներ, ինտելեկտուալ, զարգացնող խաղեր և այլն տրամադրել, խնդրեմ ձեր նվերները մինչև նոյեմբերի 14-ը թողեք  «ԼՈՖԹ»-ի երևանյան գրասենյակում, հասցե՝ Մոսկովյան 3, հեռ. +374-41-408864 (բջջ.) , +374-43-408864 (բջջ.) (https://www.facebook.com/The.LOFT.center/), եթե տեղափոխման հետ կապված հարցեր լինեն, խնդրեմ գրեք ինձ այստեղ (https://www.facebook.com/nare.atoyan) կամ զանգահարեք`093 69 23 20 հեռախոսահամարով:

Ինչպես եմ ես պատկերացնում երեխաների ժամանցը.
Ցերեկային քնի հետ կապված, ենթադրում եմ, որ խաղասենյակը բաց կլինի 11:00-13:00 և 16:00-18:00 (ամռան ամիսներին, իհարկե, ժամերը կփոփոխենք, ավելի շատ կմնանք):

Նախատեսում եմ, որ երեխաները խաղասենյակ կգան իրենց ծնողների, մեծահասակ քույր- եղբայրների կամ տատիկ- պապիկների հետ ու միասին ուրախ ժամեր կանցկացնենք:

Ժամանակի ընթացքում գուցե հանդիպեն երիտասարդ աղջիկներ և տղաներ, ովքեր կամավոր հիմունքներով կցանկանան երեխաների հետ զբաղվել, կամ տատիկ- պապիկներ, ովքեր փոքրիկների համար հեքիաթ կկարդան: Այս ամենն արդեն ապագայում կերևա:

Հուսով եմ ձեր օգնությամբ իմ պատկերացրածն իրականություն կդառնա, ու մեր գյուղի փոքրիկները նույնպես կունենան խաղերի ու անհոգության իրենց տաք անկյունը:

Հա,  քիչ էր մնում մոռանայի, իսկ իմ կողմից՝ այս ամբողջը համակարգելը, թխվածքաբլիթներն ու անսահման լավատեսությունը:

Նախապես տեղեկացնեմ, որ բոլոր փոխանցումները հրապարակվելու են: Եթե չեք ցանկանում Ձեր անունը երևա հրապարակային, խնդրում եմ, փոխանցման ընթացքում մեկնաբանության դաշտում տեղյակ պահեք այդ մասին:

Սիրով՝ Նարէ Աթոյան,

Լոռու մարզ, գ. Բովաձոր

Փոխանցումները կարող եք կատարել հետևյալ հաշվեհամարներով.

Հայաստանից և Արցախից՝

2471401335360020 (դրամ)
(Արդշինբանկ, Պայծառ Այվազյան)
Իդրամ -854 165 166 (Պայծառ Այվազյան)

Արտերկրից՝

Ayvazyan Paytsar
Acc. 2471401335360050 USD
        2471401335360040 EUR
Ardshinbank CJSC Stepanavan branch
Address: 26 S. Sargsyan Str., Stepanavan Republic of Armenia
SWIFT Code: ASHBAM22

Айвазян Пайцар
Acc. 2471401335360030  RUR
БАНК КОРРЕСПОНДЕНТ СБЕРБАНК РОССИИ
К/С 30101810400000000225
ИНН 7707083893
БИК 044525225
Р/С 30111810600000000435 RUR

Իվենթի լինքը ֆեյսբուքում
https://www.facebook.com/events/699697473747083/